ولس ته د افغاني سرې مياشتې د لاسته راوړنو يو کلن راپور تشريح شو
چهارشنبه، ۵ صَفَر، ۱۴۴۷
په تېر ۱۴۴۶ کال کې د افغاني سرې میاشتې له لوري په هېواد کې له اړمنو، پېښځپلو، راستنو شوو کډوالو، یتیمانو، معلولینو، بې سرپرسته او سوالګرو کورنیو سره د تر سره شوو خدمتونو کلنی راپور د دې ملي ټولنې د مرستیال ښاغلي حافظ عزیزالرحمن او په عملیاتي چارو کې د سکرتر جنرال د مرستیال ښاغلي مولوي روح الله عبدالسلام له لوري د مرکزي ریاست د یو شمېر مسئولینو او رسنیو د استازو په شتون کې د رسنیو د مرکز له لارې هېوادوالو سره شریک شو.
د یاد راپور له مخې د تېر یو کال په اوږدو کې د افغاني سرې میاشتې له لوري ټولټال ( ۴۶۹۰۱۱۷ څلور میلیونه، شپږ سوه نوي زره یو سل او اولس ) تنو هېوادوالو ته د خوراکي، غير خوراکي توکو او نغدي مرستو د وېش ترڅنګ د روغتيا، سرپناه، پخو خوړو او پاکو اوبو چمتو کولو برخو کې بشرپال خدمتونه وړاندې شوي دي.
