هلمند کې د افغاني سرې میاشتې له لوري د مرستو ویش ۱۵۰۰ کورنیو ته ورسېد!
د هلمند ولایت په مرکز لښکرګاه ښار کې نن د روان ۱۴۰۰ لمریز کال د مرغومي پر ۱۴مه یو ځل بیا د افغاني سرې میاشتې له لوري له ۵۰۰ نورو اړمنو کورنیو سره د خوراکي او غیر خوراکي توکو مرسته وشوه، چې په دې سره په هلمند ولایت کې د روانو مرستو ویش ۱۵۰۰ کورنیو ته ورسېد.
یاده اته قلمه مرسته چې د نړیوال فدراسیون له لوري چمتو شوې؛ په کې ۵۰ کیلو اوړه، ۲۴.۵ کیلو وریژې، ۱۰ لیتره غوړي، ۵ کیلو بوره، ۷ کیلو لوبیا، ۱ کیلو شین چای، ۳ کیلو مالګه، یو نظافتي کیټ او یو پاکټ BP۵ بیسکوټ شامل دي.
ټاکل شوې چې د افغاني سرې میاشتې له لوري به په څو ورځو کې دننه په هلمند ولایت کې ټولټال ۳۰۰۰ اړمنو کورنیو ته یاده مرسته وویشل شي، چې په کې به ۱۵۰۰ کورنیو ته د هلمند ولایت په مرکز لښکرګاه کې او پاتې ۱۵۰۰ مرستې به د هلمند ولایت په څو ولسوالیو کې وویشل کېږي.
