نړیوال فدراسیون: په دې بحراني حالت کې د افغاني سرې میاشتې هر اړخیز ملاتړ ته ژمن یو
سې شنبه، ۹ ربیع الاول ۱۴۴۷
کونړ، لغمان او نورستان ولایتونو کې د زلزله ځپلو هېوادوالو د لاسنیوي او ورته د بېړنیو مرستو برابرولو په موخه په عملیاتي چارو کې د افغاني سرې میاشتې د سکرتر جنرال مرستیال ښاغلي مولوي روح الله عبدالسلام، په افغانستان کې د ملي ټولنو نړیوال فدراسیون له مشر ښاغلي جُی سینګال او د پروګرامونو له مسئول ښاغلي احمد سلیمان سره وکتل.
کتنه کې، ښاغلي عبدالسلام د نړیوال فدراسیون د مرستو مننه وکړه او د ختیځ زون په کچه یې د اوښتو مالي او ځاني زیانونو په برخه کې د معلوماتو وړاندې کولو سربېره زیاته کړه، چې پېښه ډېره لویه ده او زلزله ځپلي پراخو بشري مرستو ته اړتیا لري.
دغه راز ښاغلي سینګال زلزله ځپلو ته د هر اړخیزو بشري مرستو برابرولو ډاډ وړاندې کړ، د زیانمنو شوو افغانانو لاسنیوی یې د ټولو انساني مسئولیت یاد کړ او د افغاني سرې میاشتې د هر اړخیز ملاتړ ژمنه یې وکړه.
