ننګرهار کې ۵۰ بې سرپرسته اړمنو کورنیو سره د ځان بسياینې لپاره نغدي مرسته وشوه
چهارشنبه، ۱ رمضان ۱۴۴۷
د افغاني سرې میاشتې له لوري په ننګرهار کې له ۵۰ بې سرپرسته اړمنو کورنیو سره د ځان بسياینې او کوچنیو کاروبارونو د پیل لپاره یو نیم میلیون (۱،۵۰۰،۰۰۰) افغانۍ نغدي مرسته وشوه.
دا مرسته چې د ختیځ زون په مرستون کې ترسره شوه، چې له مخې یې هرې کورنۍ ته ۳۰ زره افغانۍ ورکړل شوې.
یادو کورنيو تر دې وړاندې د اچار جوړونې، بیک ګنډنې او د هګۍ لرونکو چرګو د روزنې په برخو کې په نظري او عملي بڼه پنځه میاشتنۍ حرفوي زده کړې بشپړې کړې وې.
تمه ده، چې یادې کورنۍ به د ترلاسه شوې نغدي مرستې په وسیله کوچني کاروبارونه پیل کړي، څو خپلې ورځنۍ او بېړنۍ اړتیاوې پوره کړي او تر ځان بسیاینې ورسېږي.
د یادونې وړ ده، چې تر دې مخکې هم پر دغو کورنیو نږدې یو میلیون افغانۍ نغدي مرسته وېشل شوې وه.
