لوګر؛ افغاني سرې مياشتې پر ۴۰ سېلاب ځپلو کورنيو مرستې ووېشلې

دوشنبه، ۱١ محرم الحرام ۱۴۴۷

د افغاني سرې میاشتې له لوري د لوګر ولایت د ازرې ولسوالۍ په بېلابېلو کلیو کې پر ۴۰ سېلاب ځپلو کورنیو د خوراکي، غیر خوراکي توکو او نغدو پیسو مرسته ووېشل شوه.

په یاده مرسته کې هرې کورنۍ ته په خوراکي توکو کې ۵۰ کیلو اوړه، ۵ لیتره غوړي، ۱۰ کیلو وریژې، ۲ کیلو بوره،  ۱ کیلو مکروني، ۵ کیلو لوبیا، ۱ کیلو روب، ۳ قطی بیسکوټ او په غیر خوراکي توکو کې ۵ کمپلې، ۱ سیټ د پخلنځي توکي، ۱ د اوبو پلاستیکي سطل، د لوښو مینځلو شامپو، د لاس مینځلو صابون او یوه د روغتیا ساتنې بسته ورکړل شوه.

همدا راز د یادو کورنیو له جملې پر ۱۸ کورنیو چې کورونه یې بشپړ ویجاړ شوي وو؛ خېمې هم ووېشل شوې.

ترڅنګ یې له ۲ هغو کورنیو سره چې د سېلابونو له امله يې د ‎کورنیو غړو ژوند له لاسه ورکړى و او ځينې نور ټپيان شوي وو، یوه اندازه ‎نغدي مرسته هم ترسره شوه.