عمومي رئیس: د زلزله ځپلو پر وخت لاسنیوی زموږ ديني او کاري مسئولیت دی
سې شنبه، ۹ ربیع الأول ۱۴۴۷
د افغاني سرې مياشتې عمومي رئيس ښاغلي شيخ الحدیث شهاب الدين دلاور، د کونړ ولايت د نورګل ولسوالۍ د مزار درې هغو سېمو ته سفر وکړ چې د وروستۍ زلزلې له امله زيانمنې شوې دي.
ښاغلي دلاور په دغه سفر کې د روغتیايي ټیمونو له خدمتونو، د ټپيانو او شهيدانو د انتقال بهیر او د مرستندویه کارکوونکو او رضاکارانو د فعاليتونو له نږدې څارنه وکړه.
نوموړي مسئولينو او کارکوونکو ته د چارو د لا ښه مديريت، چټکو اقداماتو او اغېزمنو شوو کورنيو ته د بېړنيو مرستو رسولو په موخه لازمې لارښوونې هم وکړې.
هغه زياته کړه: د زلزله ځپلو پر وخت لاسنیوی زموږ ديني او کاري مسئولیت دی، له افغاني سرې میاشتې سره د مرستې هر توکی د زيانمنو حق او امانت دی؛ لومړيتوب مو دوى ته په بشپړه امانتدارۍ د مرستو رسول دي.
