روژه او د بېوزلو لاسنيوى؛ کابل کې ۲۵۰ کورنیو ته شاوخوا ۱۹ ټنه خوراکي مرسته ورکړل شوه

چهارشنبه، ۸ رمضان ۱۴۴۷
د افغاني سرې میاشتې له لوري نن یو ځل بیا مرکزي مرستون کې پر ۲۵۰ اړمنو، بې سرپرسته او معلولینو لرونکو بېوزلو کورنیو ۱۹.۲۵۰ ټنه د خوراکي توکو مرسته ووېشل شوه. 
دغه مرسته د روژې مبارکه میاشت کې د مستحقو کورنیو د خوراکي ستونزو د کمولو په موخه د ترکیې د سرې میاشتې په مالي ملاتړ چمتو شوې وه.
د مرستې د وېش په مراسمو کې د افغاني سرې میاشتې عمومي رئیس ښاغلي شيخ الحدیث شهاب الدین دلاور، د نوموړي مرستیال ښاغلي حافظ عزیز الرحمن، په افغانستان کې د ترکیې د سفیر مرستیال ښاغلي بلال امره بيرال او د ترکيې سرې میاشتې مسؤول ښاغلي نعیم الله کريمي حضور درلود.
 عمومي رئیس د ترکیې سرې میاشتې د بشري مرستو مننه وکړه او ویې ویل، ترکیې له اوږدې مودې راهیسې تل په ستونزمنو حالاتو کې له اړمنو افغانانو سره بشري مرستې او همکارۍ کړې دي.
 نوموړي زیاته کړه چې افغاني سره میاشت هڅه کوي؛ څو له خپلو کاري شریکانو سره په همغږۍ د هېواد نورو اړمنو او بې وزلو کورنیو ته هم مرستې برابرې کړي.
له بل لوري په افغانستان کې د ترکیې د سفیر مرستیال هم خبرې وکړې او ویې ویل، چې د روژې مبارکې میاشتې په درناوي او د دواړو هېوادونو د دوستانه اړیکو پر بنسټ ترکیه له اړمنو افغانانو سره خپلې بشري مرستې دوامدارې ساتي. هغه زیاته کړه چې د ترکیې دولت او ولس د افغانانو ستونزې خپل ستونزې ګڼي او هڅه کوي څو په بېلابېلو برخو کې د مرستو او همکاریو لړۍ لا پراخه کړي.
په افغانستان کې د ترکیې د سرې میاشتې مسٶول وویل: د ترکیې سره میاشت به له افغان ولس سره خپلې بشري مرستې جاري وساتي او هڅه به وکړي څو راتلونکي کې له افغاني سرې میاشتې سره په ګډه لا ډېرې اړمنې او بې وزله کورنۍ تر پوښښ لاندې راولي. 
د یادونې وړ ده، چې وېشل شوې مرسته کې د هرې کورنۍ لپاره ۵۰ کیلو اوړه، ۱۰ لیتره غوړي، ۱۰ کیلو وریژې، ۴ کیلو لوبیا، ۲ کیلو بوره او یوه کیلو خرما شامله وه.