د کډوالو لاسنیوي لپاره نړیواله همغږي؛ د افغاني سرې میاشتې او ۳۸ نړیوالو ملي ټولنو ترمنځ انلاین ناسته وشوه
چهارشنبه، ۲۷ محرم الحرام ۱۴۴۷
د افغاني سرې میاشتې سرپرست عمومي رئیس ښاغلي شیخ الحدیث شهاب الدین دلاور او مرستیال يې ښاغلي حافظ عزیز الرحمن د افغانستان لپاره د ملي ټولنو نړیوال فدراسیون د مرستیال ښاغلي احمد سلیمان په شتون کې د ۳۸ هېوادونو د ملي ټولنو له مسئولینو سره کډوالو د لاسنيوي اړوند د بېلابېلو مهمو موضوعاتو په اړه آنلاین ناسته وکړه.
ناسته کې د افغاني سرې میاشتې سرپرست عمومي رئیس له ګاونډيو هېوادونو د راستنېدونکو افغانانو د لاسنیوي، ګډو همکاريو د پیاوړتیا او همغږۍ کچې پر زیاتوالي ټینګار وکړ، د کډوالو ستونزې، اړتیاوې او د سرې میاشتې له لوري د وړاندې کېدونکو خدمتونو په اړه د معلوماتو شریکولو ترڅنګ یې کډوالو ته د لازمو مرستو برابرولو غوښتنه وکړه.
د نړیوالو ملي ټولنو استازو د کډوالو د وضعیت په اړه د معلوماتو له ترلاسه کولو وروسته ژمنه وکړه، چې د افغاني سرې میاشتې له لارې به بېرته راستنېدونکو افغانانو سره همکارۍ پراخې او د هغوی اړتیاوو ته په کتو به مرستې چمتو کړي.
