د کونړ زلزله ځپلو سره د افغانستان نړیوال بانک ۳ قلمه مرسته افغاني سرې میاشتې ته ورکړل شوه
سې شنبه، ۱۶ ربیع الأول ۱۴۴۷
د افغانستان په ختیځو ولایتونو کې د وروستۍ زلزلې له زیانمنو سره د مرستو په دوام؛ تازه د افغانستان نړیوال بانک له لوري د غیر خوراکي توکو ۳ قلمه مرسته، چې ۶۰ خیمې، ۶۰ فرشونه او ۱۴۲ کمپلې په کې شاملې دي، د یاد بانک د شریعه برخې د مسئول ښاغلي داد محمد په لاس افغاني سرې میاشتې ته ورکړل شوه.
د مرستې د سپارلو پر مهال د افغاني سرې میاشتې عمومي رئیس ښاغلي شیخ الحدیث شهاب الدین دلاور د افغانستان نړیوال بانک له لوري د شوې مرستې مننه وکړه او زیاته یې کړه چې ټول باید په ستونزمنو حالاتو کې د زیانمنو په لاسنیوي کې برخه واخلو، څو وکولی شو د زیانمنو هېوادوالو اړتیاوو ته پر وخت رسیدنه وکړو.
ورپسې ښاغلي داد محمد د وروستۍ زلزلې د قربانیانو ملاتړ او لاسنیوی د ټولو ګډ مسئولیت وګاڼه او د لا ډېرو مرستو برابرولو ډاډ یې وړاندې کړ.
