د ولایتي مجامعو مديرانو او غړو ته د رهبرۍ او مدیریت سمینار دایر شو!
د ولایتي مجامعو مديرانو او غړو ته د رهبرۍ او مدیریت سمینار دایر شو!
نن سه شنبه د شوال میاشتې پر ۲۴مه، د افغاني سرې میاشتې مرکزي دفتر کې د ولایتي مجامعو ریاست له لوري د رهبرۍ او مدیریت تر عنوان لاندې ۴۶ تنو د ولایتي مجامعو مديرانو او غړو ته د کاري وړتياوو د لوړونې په موخه ۲ ورځنی روزنیز سیمنار پيل شو.
د یاد سمینار د پرانيستې پر مهال د افغاني سرې میاشتې سرپرست سکرتر جنرال ښاغلي مولوي روح الله عبدالسلام ګډونوالو ته د ښه راغلاست ترڅنګ د ولایتي مجامعو د ارزښت او په ټولنه کې يې د غړو د مسؤلیتونو په اړه هر اړخیزه وينا وکړه او د افغاني سرې مياشتې او ټولنې ترمنځ د ارتباط د پياوړتيا په برخه کې يې د ولايتي مجامعو د غړو نقش اغېزمن ياد کړ.
همدارنګه نوموړي اړونده مدیرانو ته لارښوونه وکړه، څو له دې سمینار څخه اعظمي ګټه واخلي او له ترلاسه کړیو تجربو څخه په کاري چاپېریال کې کار واخلي.
د یادونې وړ ده، چې دې سیمنار کې به له ګډونوالو سره د افغاني سرې میاشتې د پېژندنې، فعالیتونو د ښه مدیریت او ولایتي مجامعو د کاري مسٸوليتونو برخه کې مهم او اړین معلومات شریک شي.
