د ناروې سره صلیب پخواني مشر له عمومي رئیس سره د مخه ښې او نوي مسؤل تعارفي ناسته وکړه
سې شنبه، ۲۱ ربیع الآخر ۱۴۴۷
د ناروې سره صلیب پخواني مشر ښاغلي اُلن بیک د افغاني سرې میاشتې له عمومي رئیس ښاغلي شیخ الحدیث شهاب الدین دلاور او د نوموړي مرستیال ښاغلي حافظ عزیز الرحمن سره تودیعي او نوي مشر ښاغلي محمد علي افتخار تعارفي ناسته وکړه.
ناسته کې ښاغلي دلاور له افغاني سرې میاشتې سره د ناروې د سره صلیب د مرستو مننه وکړه، د ښاغلي اولن بَک هڅې یې وستایلې او نوي مشر ښاغلي محمد علي افتخار ته یې په نوي مسؤلیت کې د بریالیتوب هیله څرګنده کړه.
په افغانستان کې د ناروې سره صلیب پخواني مشر په خپلو خبرو کې وویل: زما لپاره دا ویاړ و چې له افغاني سرې میاشتې سره مو د بشري خدمتونو په برخه کې ګډ کار وکړ، زه د دې خیریه ملي ټولنې د ژمنتیا، همکارۍ او هڅو قدردانی کوم او هیله لرم چې دا ګډ کار همداسې دوام ومومي.
ورپسې په افغانستان کې د ناروې سره صلیب نوي مسؤل له افغاني سرې میاشتې سره د ګډو بشري فعالیتونو په ترسره کولو خوښي وښوده او زیاته یې کړه: زموږ هدف د بشري ارزښتونو پياوړتیا، د اړمنو او زیانمنو لاسنیوی دی، زه تمه لرم چې زموږ ګډ کار به د لا ښه خدمت زمینه برابره کړي.
