د ملي ټولنو نړیوال فدراسیون؛ له افغاني سرې مياشتې سره د بشري مرستو د پراختیا او مالي چارو ډيجيټلي کولو ته ژمن یو
دوشنبه، ۱۸ محرم الحرام ۱۴۴۷
د افغاني سرې میاشتې مرستیال ښاغلي حافظ عزیز الرحمن د افغانستان لپاره د ملي ټولنو نړیوال فدراسیون له مرستیال ښاغلي احمد سلیمان سره د وروستیو سیلابونو له امله هېوادوالو ته د اوښتو زیانونو، د راستنېدونکو کډوالو د وضعیت او مالي سیستم د ډیجیټلي کولو برخه کې د همکارۍ په موخه ناسته وکړه.
کتنه کې د افغاني سرې میاشتې مرستیال ښاغلي عزیز الرحمن د نړیوال فدراسیون له دوامداره همکاریو مننه وکړه او د پېښځپلو د ستونزو او کړاوونو راکمولو برخه کې یې د نړیوال فدراسیون مرستې حیاتي وبللې.
نوموړي زیاته کړه، چې د هېواد په یو شمېر سیمو کې د وروستیو سېلابونو او ګاونډیو هېوادونو څخه د کډوالو یو دمي راتګ له امله د بشري مرستو اړتیا ډېره شوې او زیانمن شوي هېوادوال پراخ ملاتړ او لاسنيوي ته اړتیا لري.
دغه راز ښاغلي عزیز الرحمن له نړیوال فدراسیون څخه د افغاني سرې میاشتې د مالي چارو د لا ښه تنظیم په موخه د مالي سیستم د ډیجیټلي کېدو برخه کې د مالي ملاتړ غوښتنه هم وکړه.
د ملي ټولنو د نړیوال فدراسیون مرستیال د افغاني سرې میاشتې له لوري کډوالو او پېښځپلو ته وړاندې کېدونکي خدمتونه وستایل او ژمنه یې وکړه چې د کډوالو، سېلاب ځپلو او اړمنو کورنیو د لاسنيوي ترڅنګ به د مالي سیستم د ډیجټلي کېدو برخه کې بشپړه همکاري کوي.
