د سرې میاشتې مرستیال د رضاکارانو ظرفیت لوړونې په موخه د ډنمارک سره صلیب له مسؤول سره وکتل
یکشنبه، ۱۶ جمادي الآخره ۱۴۴۷
د افغاني سرې میاشتې مرستیال ښاغلي حافظ عزیزالرحمن مرکزي دفتر کې د ډنمارک سره صلیب د ملي ټولنو د پراختیا له سلاکار ښاغلي یعقوب سره د رضاکارانو د ظرفیت لوړونې، روزنیزو پروګرامونو او ملي ټولنې د پیاوړتیا په اړه ناسته وکړه.
ناسته کې ښاغلي حافظ عزیزالرحمن رضاکاران د افغاني سرې میاشتې د بشري ځواک مهمه برخه یاده کړه او زیاته یې کړه، رضاکاران د طبیعي پېښو پر مهال د مرستو رسولو، ژغورنې عملیاتو او بشري خدمتونو په وړاندې کولو کې مهم رول لري.
د ډنمارک د سره صلیب سلاکار د افغاني سرې میاشتې په فعالیتونو کې د رضاکارانو رول مهم یاد کړ او ډاډ یې څرګند کړ چې نږدې راتلونکې کې به د رضاکارانو د ظرفیت لوړونې برخه کې یو ښوونیز پروګرام پیل او د هغوی د وړتیاوو لوړونې لپاره به خپلې تخنیکي او مسلکي همکارۍ جاري وساتي.
