د افغاني سرې میاشتې مرستیال ملا نورالدین ترابي د ترکیې د کولتاش بنسټ له رییس سره لیدنه ترسره کړه!
نن د کب پر ۲۱مه د افغاني سرې میاشتې مرستیال ملا نورالدین ترابي د ترکیې هېواد د کولتاش خیریه بنسټ له مشر مصطفی برُت او ددې بنسټ له مرستیال ایدي شک سره په خپل کاري دفتر کې لیدنه وکړه.
په یاده لیدنه کې د افغاني سرې میاشتې مرستیال ملا نورالدین ترابي افغانستان ته د کولتاش خیریه بنسټ د مشر او مرستیال په راتګ خوښي وښوده او ویې ویل، چې دی هیله لري، چې افغانستان ته د کولتاش خیریه بنسټ د مسوولینو راتګ به ددې باعث شي، چې د مظلومو افغانانو غږ تر نړیوالو ورسېږي او له افغانانو سره به مرستې وکړي.
نوموړي وویل، چې په افغانستان کې دا مهال د بېوزلۍ کچه تر ۷۵ سلنه رسېدلې او افغانان دا مهال له هر څه ډېر خوراکي مرستې ته اړتیا لري. نوموړي وویل، مرسته کوونکي بنسټونه که غواړي په خپل لاس مرستې وویشي او یا یې افغاني سرې میاشتې ته د ویش لپاره ورکړي؛ مونږ ورته هر ډول زمینه مساعده وو.
د افغاني سرې میاشتې مرستیال ملا نورالدین ترابي د کولتاش مشر ښاغلي مصطفی برُت ته وویل، چې غوره داده، چې په دې سختو حالاتو کې له افغانانو سره بنسټیزې مرستې ترسره شي؛ ترڅو افغانان په خپلو پښو ودرېږي. نوموړي وویل، چې دوی ښه ګڼي چې د مرستو توکي په افغانستان کې دننه واخیستل شي.
د کولتاش خیریه بنسټ نشر مصطفی برُت وویل دوی هوډ لري په افغانستان کې خپلې مرستې پراخې کړي او په همدې موخه یې افغانستان ته سفر کړی.
