د افغاني سرې میاشتې مرستیال د راستنېدونکو کډوالو لاسنیوي لپاره د ٢٥ هېوادونو له ملي ټولنو سره انلاین ناسته وکړه
کابل - دوشنبه، ۴ محرم الحرام ۱۴۴۷
د افغاني سرې میاشتې مرستیال ښاغلي حافظ عزیز الرحمن او د مرکزي دفتر يو شمېر مسٸولينو په افغانستان کې د ملي ټولنو نړیوال فدراسیون د مرستیال ښاغلي احمد سلیمان په شتون کې د ۲۵ هېوادونو د ملي ټولنو له مسئولینو سره ګاونډيو هېوادونو څخه د راستنېدونکو کډوالو او وچکالۍ ځپلو کورنیو ته د بېړنیو بشري مرستو د جلب په موخه آنلاین ناسته وکړه.
ناسته کې د افغاني سرې میاشتې مرستیال په وروستیو کې د وچکالۍ، طبيعي او غیرې طبيعي پېښو له امله افغانانو ته د اوښتو زیانونو، له ګاونډيو هېوادونو څخه په يو دمي شکل د راستنېدونکو کډوالو د راتګ، شته ستونزو او امکاناتو په اړه معلومات شریک کړل او د پراخ ملاتړ او بېړنیو همکاریو غوښتنه یې وکړه.
دغه راز په افغانستان کې د ملي ټولنو نړیوال فدراسیون مرستیال هم هرات ولایت ته د راستنېدونکو کډوالو د وضعیت ارزونې په موخه د خپل سفر پر مهال ترلاسه کړي معلومات، اړتیاوې، ستونزې او وړانديزونه له نړیوالو سره شریک کړل او دې ستونزمن حالت کې يې د مرستو پر پراخېدو ټينګار وکړ.
په پای کې د نړیوالو ملي ټولنو مسئولینو له افغاني سرې میاشتې سره د بشري کړاوونو د راکمولو او بحران د کابو کولو ژمنه وکړه او هېواد ته د راستنېدونکو کډوالو لاسنیوی یې د ټولو ملي ټولنو ګډ مسؤلیت وباله.
