د افغاني سرې میاشتې عمومي سرپرست رییس دوحه کې د قطر د سرې میاشتې له سکرتر جنرال سره ولیدل
نن د چهارشنبې په ورځ د روان ۱۴۰۰ لمریز کال د کب پر ۴مه نېټه د افغاني سرې میاشتې سرپرست عمومي رییس مولوي مطیع الحق خالص دوحه کې د قطر هېواد د سرې میاشتې له سکرتر جنرال علي بن حسن الحمادي او ورسره مل پلاوي سره ولیدل.
په دې لیدنه کې دواړو لوریو له افغانستان سره د بشري مرستو پر ډېرښت خبرې وکړې. د افغاني سرې میاشتې سرپرست عمومي رییس د قطر د سرې میاشتې له سکرتر جنرال او ورسره پلاوي غوښتنه وکړه، چې افغانستان دا مهال سترو بشري مرستو ته اړتیا لري او باید د قطر سره میاشت په دې برخه کې پراخه ونډه واخلي.
د قطر د سرې میاشتې سکرتر جنرال ښاغلي علي بن حسن الحمادي ژمنه وکړه، چې دوی به له افغاني سرې میاشتې سره د خپلو مرستو کړۍ پراخوي او د افغاني سرې میاشتې لاسنیوی به کوي.
