د افغاني سرې میاشتې عمومي رئیس د انګلستان له استازي سره د بېځایه شويو او زیانمنو پر ستونزو آنلاین خبرې وکړې
چهارشنبه، ۱۴ شوال ۱۴۴۷
د افغاني سرې میاشتې عمومي رئیس، شیخ الحدیث شهاب الدین دلاور، د افغانستان لپاره د انګلستان له ځانګړي استازي، ښاغلي ریچارډ لینډسي سره په آنلاین ناسته کې د داخلي بېځایه شويو کورنیو او د وروستیو ورښتونو له امله د زیانمنو پر ستونزو خبرې وکړې.
په ناسته کې عمومي رئيس د افغاني سرې میاشتې له لوري بېځایه شويو کورنیو ته د نغدي مرستو، خوراکي او غیر خوراکي توکو د وېش په اړه معلومات وړاندې کړل او د وروستیو ورښتونو له امله د زیانمنو کورنیو د وضعیت او اړتیاوو په اړه يې هم معلومات شریک کړل.
ښاغلي دلاور وویل: افغاني سره مياشت په دوامداره توګه له اړمنو، کډوالو او بې سرپرسته کورنیو سره بشري مرستې کوي او هڅه کوي چې مرستې پر وخت او په منظم ډول مستحقو هېوادوالو ته ورسېږي.
په پای کې ښاغلي لینډسي د افغاني سرې میاشتې د بشري فعالیتونو ستاینه وکړه او د همکارۍ د دوام ترڅنګ یې د بشري مرستو د پراختيا او د اړمنو د لاسنیوي په برخه کې د انګلستان د دوامداره ملاتړ ډاډ ورکړ.
