د افغاني سرې میاشتې سرپرست عمومي په خوست ولایت کې د افغاني سرې میاشتې د نمایندګۍ د ریاست لیدنه وکړه!
د افغاني سرې میاشتې سرپرست عمومي رئیس ښاغلي مولوي مطیع الحق خالص نن د محرم الحرام پر ۴مه په خوست ولایت کې د افغاني سرې میاشتې د نمایندګۍ د ریاست لیدنه وکړه.
نوموړي د لیدنې پر مهال د افغاني سرې میاشتې کارکوونکو ته وویل، چې د افغاني سرې میاشتې رضاکاران په بشري مرستو کې بنسټیز ځای لري او په نړیواله کچه د رضاکارانو ستر اهمیت شته. نوموړي وویل دی غواړي په ټول هېواد کې د افغاني سرې میاشتې د رضاکارانو له تثبیت وروسته د لسګونو زرو نویو رضاکارانو د ثبت او جلب پروسه پیل کړي.
نوموړي د افغاني سرې میاشتې د خوست له مسوولینو په سپېره ولسوالۍ کې د زلزلې له امله د شته ستونزو او اړتیاو تازه معلومات ترلاسه کړل او تر خپله وسه یې د شته ستونزو د حل او اړتیاو د پوره کولو ډاډ څرګند کړ.
د افغاني سرې میاشتې سرپرست عمومي رئیس خوست ولایت کې د افغاني سرې میاشتې د ریاست د ټولو څانګو او کارکوونکو لیدنه هم ترسره کړه.
