د افغاني سرې میاشتې سرپرست عمومي رئیس ددې خیریه ملي ټولنې اړوند مرکزي روغتون کې د شونډو او تالو چاود ناروغانو د درملنې له بهیر څخه لیدنه وکړه
د افغاني سرې میاشتې سرپرست عمومي رئیس ددې خیریه ملي ټولنې اړوند مرکزي روغتون کې د شونډو او تالو چاود ناروغانو د درملنې له بهیر څخه لیدنه وکړه
نن دوشنبه د جمادي الأولی د میاشتې پر ۳۰مه، د افغاني سرې میاشتې سرپرست عمومي رئيس ښاغلي شیخ الحدیث شهاب الدین دلاور د سرې میاشتې په مرکزي روغتون کې د بنګله دېش د مرکز الاسلام بنسټ روغتیاپالانو له لوري د شونډو او تالو چاود پر رنځ د اخته ناروغانو د درملنې او عملیات له بهیر څخه لیدنه وکړه.
یاده کتنه کې سرپرست عمومي رئيس د یاد بنسټ او روغتیا پالانو څخه مننه وکړه چې په ستونزمن وخت کې یې د افغاني سرې میاشتې له لارې د بېوزلو افغانانو په درملنه او لاسنیوي کې ونډه اخیستې او دغه همکاري یې د اړمنو او بېوزلو کورنیو د ناروغانو لپاره ګټوره او اغېزمنه وبلله.
دا راز ښاغلي دلاور روغتیاپالانو ته سپارښتنه وکړه، څو د شونډو او تالو چاود په رنځ د اخته ناروغانو په درملنه او عملیاتو کې له بشپړ صداقت او اخلاص څخه کار واخلي او له ناروغانو سره د اسلامي اخلاقو په رڼا کې چلند وکړي. نوموړي ناروغانو ته د الله جل جلاله له دربار څخه د کاملې او عاجلې شِفا غوښتنه هم وکړه.
