د افغاني سرې میاشتې سرپرست رییس مولوي مطیع الحق خالص ناروې کې د ناروې د سره صلیب له مشر سره لیدنه ترسره کړه
د افغاني سرې میاشتې سرپرست رییس مولوي مطیع الحق خالص ناروې هېواد کې د ناروې هېواد د سره صلیب له مشر رابرټ موډ سره له افغاني سرې میاشتې سره د مرستو پر دوام او پراختیا خبرې وکړې.
په دې ناسته کې په افغانستان کې د اړمنو وګړو پر اړتیاو او د افغانستان پر روان بد بشري وضعیت خبرې وشوې. د ناروې د سور صلیب مشر رابرټ موډ د افغاني سرې میاشتې سرپرست رییس ته ډاډ ورکړ، چې دوی غواړي په افغانستان کې خپل فعالیتونه پراخ او ډېر کړي. رابرټ موډ وویل، چې دوی په همدې موخه افغانستان ته د ناروې د سره صلیب سکرتر جنرال برنټ اپیلاند لېږلی. نوموړي وویل، چې د ناروې سور صلیب له افغاني سرې میاشتې سره اوږه په اوږه مزل کولو ته هڅې کوي او مرستې به ډېروي.
د افغاني سرې میاشتې سرپرست رییس د ناروې هېواد د سره صلیب له مشره وغوښتل، چې د افغاني سرې میاشتې د کارکوونکو د ظرفیت د لوړولو په برخه کې د دوی لاسنیوی وکړي.
ښاغلي مولوي مطیع الحق خالص د ناروې د سره صلیب مشر ښاغلي رابرټ موډ ته ډاد ورکړ، چې د دوی مرستې به افغانستان کې اړمنو وګړو ته پر وخت په پوره شفافیت رسېږي.
په دې یو ساعته ناسته کې د ناروې د سره صلیب پر رییس سربېره د ناروې د سره صلیب مرستیال او مالي رییس هم ګډون درلود.
