تخار؛ ۵۰ سېلاب ځپلې کورنۍ د ۵۲۵ زره افغانیو له نغدي مرستې برخمنې شوې
چهارشنبه، ۱ محرم ۱۴۴۸
د افغاني سرې میاشتې له لوري د تخار ولایت په نمک آب او چال ولسوالیو کې ۵۰ سېلاب ځپلې کورنۍ د ۵۲۵ زره افغانیو له نغدي مرستې برخمنې شوې.
یاده مرسته د ملي ټولنو نړیوال فدراسیون له لوري چمتو شوې وه، چې له مخې یې هرې کورنۍ ته ۱۰ زره او ۵۰۰ افغانۍ ورکړل شوې.
دغه نغدي مرسته د سېلاب ځپلو کورنیو د لومړنیو اړتیاوو د پوره کولو په موخه ترسره شوه.
د یادونې وړ ده، چې تېره ورځ هم د همدې ولایت په بنګي او اشکمش ولسوالیو کې له ۵۰ سېلاب ځپلو کورنیو سره ورته نغدي مرسته شوې وه.
افغاني سره میاشت هڅه کوي؛ څو د نغدي مرستو له لارې د طبیعي پېښو له امله د زیانمنو کورنیو د لومړنیو اړتیاوو په پوره کولو کې ونډه واخلي.
