بلخ کې د افغاني سرې میاشتې پراخ روغتیايي حضور؛ زرګونو ناروغانو ته وړیا خدمتونه وړاندې شول
دو شنبه، ٢٤ جمادى الآخره ١۴۴٧
د افغاني سرې میاشتې روغتیايي کارکوونکو د بلخ ولایت په بېلابېلو ولسوالیو او کلیو کې د تېرو ۳۰ ورځو په موده کې پراخ او دوامدار روغتیايي خدمتونه وړاندې کړي دي.
د دغو خدمتونو په ترڅ کې ۷۲۸۳ تنه ناروغان د معاینې او درملو د ورکړې، د ټپونو د پانسمان، د واکسینونو د تطبیق، د خوارځواکۍ د تشخیص او مخنیوي، د امیندوارۍ له زېږون وړاندې او وروسته د اړینو روغتیايي مشورو، او د کورني پلان د تنظیم له خدمتونو څخه برخمن شوي دي.
سربېره پر دې، د افغاني سرې میاشتې روغتیايي ټیمونو ۲۰۹۹۸ تنو ته د ناروغیو د مخنیوي، د مور او ماشوم د روغتیا، تغذیې، او د سالم ژوند د تګلارو په برخه کې لازمې روغتیايي مشورې وړاندې کړې دي.
د دغو فعالیتونو موخه د لومړنیو روغتیايي خدمتونو پراخول، د ناروغیو مخنیوی او په ځانګړي ډول په لرې پرتو او اړمنو سیمو کې د خلکو د روغتیا ښه والی دی.
دا خدمتونه په داسې شرایطو کې وړاندې کېږي، چې ګڼې کلیوالې سیمې له روغتیايي اسانتیاوو بېبرخې دي، او د افغاني سرې میاشتې دا هڅې د زرګونو کورنیو لپاره د باور او هیلهمندۍ سبب ګرځېدلې دي.
