د افغاني سرې میاشتې سرپرست عمومي رئیس او ورسره پلاوي روانه اونۍ د ننګرهار ولایت په بېلابېلو ولسوالیو او د مرکز اړوند ځینو سیمو کې سیلابونو مالي او ځاني زیانونه واړول د ارزونې په موخه ننګرهار ولایت کې د زیانمنو کورنیو له مشرانو سره لیدنه ترسره کړه!
روانه اونۍ د ننګرهار ولایت په بېلابېلو ولسوالیو او د مرکز اړوند ځینو سیمو کې سیلابونو مالي او ځاني زیانونه واړول. د افغاني سرې میاشتې سرپرست عمومي رئیس ښاغلي مولوي مطیع الحق خالص او ورسره پلاوي نن د محرم الحرام پر ۲۱مه د یادو زیانونو د ارزونې په موخه ننګرهار ولایت کې د وروستیو سیلابونو له امله د بیزِ اکمالاتي سیمې د زیانمنو کورنیو له مشرانو سره لیدنه ترسره کړه. نوموړي لومړی د سیلابونو له امله له زیانمنو شویو کورنیو سره خواخوږي وښوده او دوی ته یې د افغاني سرې میاشتې له لوري د لاسنیوي ډاډ ورکړ.
په لیدنه کې د افغاني سرې میاشتې سرپرست عمومي رییس وویل "له بده مرغه چې د هېواد په ګڼو ولایتونو کې وروستیو ورښتونو پراخ زیانونه اړولي او دوی ټولو ته د مرستې لاس ورکول د افغاني سرې میاشتې کوښښ دی". نوموړي وویل "د طبیعي پېښو پر وخت لازمه ده مرستندوی او مسوول ارګانونه د زیانمنو لاسنیوي ته ور وړاندې شي؛ مونږ به د بیزِ اکمالاتي سیلاب ځپلو کورنیو سره په اونۍ کې دننه مرسته وکړو، زه له تاسې سره خواخوږۍ او د زیانمنو کورونو له نېږدې لیدو ته راغلی یم؛ ترڅو د زیانمنو لاسنیوی وکړم."
له ناستې وروسته ښاغلي مولوي مطیع الحق خالص د سیلاب له امله نړیدلي کورونه هم له نېږدې ولیدل او زیانمنو ته یې د لاسنیوي ډاډ ورکړ.
