د افغاني سرې مياشتې مرستيال د اوبو کندو د ترميم پروژو د پلي کېدو په موخه بلخ ته ورسېد
سې شنبه، ۱۱ ذو القعده ۱۴۴۷
د افغاني سرې مياشتې مرستيال ښاغلی حافظ عزيز الرحمن د بلخ او سمنګان ولايتونو کې د اوبو د کندو د ترميم پروژو د پلي کېدو په موخه بلخ ته ورسېد.
ټاکل شوې ده، چې نوموړی به د خپل سفر په لړ کې د يادو ولايتونو په بېلابېلو سيمو کې د اوبو دکندو پروژې پلي کړي، چې موخه يې
د سيمې اوسېدونکو لپاره پاکو اوبو ته لاسرسی او د لومړنیو اړتیاوو پوره کول دي، چې دا به د عامې روغتیا د وضعیت په ښهوالي کې مهم رول ولوبوي.
د دواړو ولایتونو په کچه يادې پروژې په ټوله کې د اوبو ۶۰۰ کندو ترمیم تر پوښښ لاندې نیسي، چې شاوخوا ۵۰۰ زره تنه به ترې ګټه واخلي او ۱۸۰۰ کاریګرو ته به د کار زمینه برابره شي.
سربېره پر دې، ښاغلی مرستيال به د خپل سفر په لړ کې د شمال زون اړوند د نمايندګيو له بېلابېلو څانګو او فعاليتونو څخه ليدنه وکړي، څو موجودې ستونزې او نيمګړتياوې و ارزوي او د حل لپاره يې لازمې لارښوونې وکړي.
تمه ده، چې دغه سفر به د افغاني سرې مياشتې د فعاليتونو د پياوړتيا، همغږۍ او اغېزمنتيا په برخه کې مثبتې پايلې ولري.
