د افغاني سرې میاشتې سرپرست رییس د ترکیې د سرې میاشتې له رییس سره انلاین ناسته ترسره کړه
نن د روان ۱۴۰۰لمریز کال د مرغومي پر ۲۳مه نېټه د افغاني سرې میاشتې سرپرست رییس مولوي مطیع الحق خالص د ترکیې د سرې میاشتې له رییس ډاکتر کریم کینک سره انلاین ناسته ترسره کړه.
په ناسته کې د افغاني سرې میاشتې سرپرست رییس مولوي مطیع الحق خالص وویل، چې مونږ له ترکیې توقع لرو، چې تل له افغاني سرې میاشتې سره په ستونزو کې اوږه پر اوږه ودرېږي او هر ځای په نړیوالو مجلسونو کې زمونږ غږ نړۍ ته ورسوي، ځکه د افغانستان سره میاشت د فدراسیون غړې ده او ترکیه د فدراسیون مرستیالي په غاړه لري.
نوموړي وویل، چې ترکیه او افغانستان تاریخي اړیکې لري او د افغانانو په زړونو کې د ترکیې وګړي ځانګړی ځای لري.
ښاغلي مولوي مطیع الحق خالص وویل، چې افغانستان کې د ترکیې سرې میاشتې نمایندګۍ له مونږ سره تل مرسته کړې، زمونږ هیله ده چې د ترکیې سره میاشت خپل فعالیتونه په افغانستان کې نور هم پراخ کړي، ځکه ژمی دی او افغانان له ګڼو ستونزو سره لاس او ګریوان دي. نوموړي وویل، چې مونږ درک کوو چې ترکیه له افغانستان سره د مرستې دلچسپي لري.
ښاغلي خالص وویل، چې ترکیه یو پیاوړی هېواد دی او پر نورو هېوادونو یې اغېز شته، نو ځکه به د ترکیې هڅې د افغاني سرې میاشتې لپاره ډېرې ګټورې وي.
د افغاني سرې میاشتې سرپرست رییس ښاغلي مولوي مطیع الحق خالص وویل، چې مونږ ژمنه کوو، چې له خپل وس سره سم د ترکیې مرستې اړمنو ته په شفاف ډول رسوو او ژمن یو، چې د افغاني سرې میاشتې له اصولو سره سم به مخکې ځو.
نوموړي وویل، چې د اسلامي امارت رهبرۍ مونږ ته ډاډ راکړی، چې دوی به د افغاني سرې میاشتې اصول او له فدراسیون سره کړو تعهداتو ته ژمن وي او تر اوسه د افغانستان اسلامي امارت د افغاني سرې میاشتې په امورو کې مداخله نده کړې.
د ترکیې د سرې میاشتې رییس ښاغلي ډاکتر کریم کنیک وویل، چې مونږ د افغانانو اوسنی حالت درک کوو او تل به د افغانستان تر څنګ ولاړ یو. نوموړي وویل، چې مونږ به د نړیوالو ناستو له لارې د افغانانو حالت نړۍ ته رسوو او کابل کې به زمونږ د ترکیې د سرې میاشتې دفتر له افغاني سرې میاشتې سره تل اوږه په اوږه مزل کوي.
ښاغلي ډاکتر کریم کنیک وویل، چې زمونږ د بهرنیو چارو وزارت له افغانستان سره دلچسپي لري او د هغوی په مرسته په پام کې لرو، چې په روان کال کې په ټوله ترکیه کې د افغانستان لپاره د مرستو د راټولولو کمپاین ترسره کړو او له نړیوالو سره په ناستو کې افغانانو ته مرستې راټولې کړو.
نوموړي وویل، چې له افغانستان څخه د امریکا له وتلو مخکې د ملي ټولنو کانفرانس په نړیواله کچه له افغانستان سره د مرستو ژمنه کړې وه؛ ځکه خو دوی هڅه کوي، چې له افغانستان سره ژمنه شوې مرسته افغانستان ته ورسوي. نوموړي وویل، چې دی له نړیوال فدراسیون سره په دې اړه غږېدلی او دده پر اند افغاني سره میاشته ددې وړتیا لري، چې دغه مرستې ورته وسپارل شي.
د افغاني سرې میاشتې سرپرست رییس وویل، چې دوی په ترکیه کې له افغانستان سره د مرستو راټولولو لپاره د ترکیې د سرې میاشتې له لوري د سرتاسري کمپاین هرکلی کوي. نوموړي وویل، چې که په ترکیه کې د افغانستان لپاره مرستې راټولې شي، نو په دې سره به د افغانانو ډېر لاسنیوی وشي.
نوموړي وویل، چې مونږ نړۍ ته سترګې په لار یو، چې د امریکا له وتلو مخکې له افغانستان سره د مرستو کړې ژمنه ترسره کړي.
