د شونډو او تالو چاود پر ناروغۍ د اخته ناروغانو د درملنې او عمليات بهير د يوې غونډې په ترڅ کې پاى ته ورسېد!
د شونډو او تالو چاود پر ناروغۍ د اخته ناروغانو د درملنې او عمليات بهير د يوې غونډې په ترڅ کې پاى ته ورسېد!
د جمادي الآخره د میاشتې پر ٢ مه، د افغاني سرې میاشتې اړوند په کابل مرکزي روغتون کې ددې خیریه ملي ټولنې په مرسته له بنګله دیش هېواد څخه د راغلو ماهرو روغتیاپالانو له لوري د شونډو او تالو چاود په رنځ د اخته ناروغانو د وړیا درملنې او عملياتونو د بهير د اختتاميې غونډه د سرې مياشتې د سکرتر جنرال د عملياتي مرستيال ښاغلي مولوي عبداللطيف ثابت په شتون کې ترسره شوه.
په غونډه کې ښاغلي ثابت په خپلو خبرو کې د بنګلديش مرکز الاسلام بنسټ استازو ته د ياد نېک اقدام په اړه د افغاني سرې مياشتې د سرپرست عمومي رئيس ښاغلي شيخ الحديث شهاب الدين دلاور د مننې پيغام ورساوه او د درملنې د ياد بهير په ترسره کېدو يې خوښي وښوده او د شونډو او تالو چاود پر رنځ د اخته ناروغانو د درملنې او عملياتونو د دوام هيله يې څرګنده کړه، نوموړي د یاد بنسټ مسٸولينو ته ډاډ ورکړ چې تاسې کولى شئ خپل بشرپال او روغتيايي فعاليتونه د افغاني سرې مياشتې له لارې ترسره او د افغان ولس د لاسنيوي او مرستې په برخه کې ددې خيريه ملي ټولنې ملاتړ وکړئ.
ورپسې د بنګلديش د مرکز الاسلام بنسټ په استازولۍ ښاغلي حمزه شهيد الاسلام د ياد پروګرام په اړه هر اړخيزې خبرې وکړې او د افغاني سرې مياشتې له لوري د دوى متخصصو ډاکټرانو ته ددې پروسې د مخته وړلو په برخه کې يې د سهولتونو او اسانتياوو د برابرولو په پار مننه وکړه او زياته يې کړه: " د درملنې په دې بهير کې مونږ وکولى شول، څو د بېلابېلو ولاياتو څخه راغلي د شونډو او تالو چاود پر رنځ د (۳۴۵) تنو ناروغانو ثبت او راجستر او له دې جملې د (۸۵) تنو ناروغو ماشومانو عملياتونه په بريالي توګه ترسره کړو، نوموړي دا راز وويل چې دا به زمونږ وروستى راتګ نه وي بلکې د راجستر شويو پاتې ناروغانو درملنه به په نزدې راتلونکي کې په بل پړاو کې ترسره شي.
