کابل؛ د افغاني سرې میاشتې عمومي رئیس له قلبي روغتون ليدنه وکړه
چهارشنبه، ۲۸ صفر ۱۴۴۸
د افغاني سرې میاشتې عمومي رئیس، ښاغلي شیخ الحدیث شهاب الدین دلاور، د دې ادارې له لوري په نوي پرانیستل شوي قلبي روغتون کې د وړاندې کېدونکو روغتیايي خدمتونو ارزونه وکړه او د بستر ناروغانو د درملنې له بهیر یې له نږدې ليدنه وکړه.
ښاغلي دلاور د روغتون له بېلابېلو څانګو څخه د لیدنې پر مهال د متخصصو ډاکټرانو، نرسانو او نورو روغتیايي کارکوونکو فعالیتونه او ناروغانو ته د وړاندې کېدونکو خدمتونو څرنګوالی و ارزاوه. نوموړي د روغتیاپالانو فعالیتونه مثبت وبلل او د هغوی هڅې یې وستایلې.
نوموړي د روغتیايي خدمتونو د کیفیت د لا ښه والي، د ناروغانو د معیاري درملنې او له ناروغانو او د هغوی له کورنیو سره د مناسب چلند په اړه لازمې لارښوونې وکړې او ټینګار یې وکړ، چې ټولو ناروغانو ته باید له هر ډول توپیر پرته پر وخت او د اړتیا مطابق روغتیايي خدمتونه وړاندې شي.
ښاغلي دلاور د بستر ناروغانو له والدینو سره هم وکتل او ډاډ یې ورکړ، چې د افغاني سرې میاشتې د قلبي روغتون متخصص ډاکټران او روغتیايي کارکوونکي شپه او ورځ د ناروغانو په خدمت کې دي او د زړه سوري لرونکو ماشومانو د تخصصي درملنې لپاره به خپلې هڅې دوامداره وساتي.
افغاني سره میاشت د قلبي روغتون له لارې هڅه کوي، چې د زړه سوري لرونکو اړمنو ماشومانو لپاره په هېواد کې دننه معیاري او تخصصي روغتیايي خدمتونو ته د لاسرسي زمینه پراخه کړي.
