لغمان کې د سرې میاشتې له لوري ۵۵۰ کورنیو ته خوراکي توکي وویشل شول!
نن د روان ۱۴۰۰ لمریز کال د لیندۍ پر ۲۷مه لغمان ولایت په مرکز کې د افغاني سرې میاشتې له لوري له۵۵۰ اړمنو کورنیو ته د خوراکي توکو مرسته په لغمان ولایت کې د سرې میاشتې د رییس مولوي ولي الله په شتون کې وویشل شوه.
په دې مرسته کې ۲۰ کیلو اوړه، ۱۰ کیلو وریژې او ۶ کیلو غوړي شامل وو. یاده مرسته د ترکیې هېواد د سرې میاشتې له لوري افغاني سرې میاشتې ته سپارل شوې وه؛ ترڅو اړمنو کورنیو ته وویشل شي. په لغمان ولایت کې یاده مرسته د هغو ۱۵۵۰ خوراکي بستو برخه ده، چې په تېره اونۍ په لغمان ولایت کې وویشل شوې.
