چین سره صلیب افغاني سرې میاشتې ته د سېلاب ځپلو لپاره سل زره ډالر مرسته وسپارله
سې شنبه، ۲۷ شوال ۱۴۴۷
د چین سره صلیب له لوري افغاني سرې میاشتې ته د سېلاب ځپلو کورنیو د ملاتړ لپاره سل زره امریکایي ډالر نغدي مرسته ورکړل شوه.
یاده مرسته په افغانستان کې د چین د مرستیال سفیر ښاغلي باٶ ژو هوی له خوا د افغاني سرې میاشتې عمومي رئیس، ښاغلي شیخ الحدیث شهاب الدین دلاور ته وسپارل شوه.
د مرستې د سپارلو په مراسمو کې د افغاني سرې میاشتې عمومي رئیس د چین سره صلیب او د دغه هېواد له خلکو مننه وکړه او ویې ویل، چې هغوی تل په سختو حالاتو کې له افغانانو سره مرسته کړې ده. نوموړي ډاډ ورکړ، چې دا مرسته به په شفاف او عادلانه ډول مستحقو کورنیو ته ورسول شي.
د چین مرستیال سفیر هم ټینګار وکړ، چې هېواد یې د افغانستان د خلکو ترڅنګ ولاړ دی او دا مرسته د دواړو هېوادونو ترمنځ د بشري همکاریو د پیاوړتیا برخه ده. هغه زیاته کړه، چې چین به په راتلونکي کې هم د افغانانو ملاتړ ته دوام ورکړي.
