له نړۍ د شاوخوا ۸۰ هېوادونو د سرو میاشتو، سرو صلیبونو او نړیوال غورځنګ غړو انلاین ناسته ترسره کړه!
تېره ورځ د روان ۱۴۰۰ لمریز کال د لیندۍ پر ۲۹مه د نړۍ له لر او بر څخه د شاوخوا ۸۰ هېوادونو د سرو میاشتو، سرو صلیبونو او نړیوال غورځنګ مشرانو او سکرتر جنرالانو ګډه انلاین ناسته د وبا، کډوالۍ، بحرانونو او مدني ناکراریو په اړه ترسره شوه.
د افغاني سرې میاشتې سرپرست عمومي رییس مولوي مطیع الحق خالص د ناستې ګډونوالو ته وویل، چې "افغاني سره میاشت د خپل ناپېیلتوب، استقلالیت او ناپلوۍ په ساتلو د افغانستان اسلامي امارت له بشپړ ملاتړه برخمنه ده، مونږ له خپلو نهضتي همکارانو هیله کوو، چې له مونږ سره مرستې او همکارۍ پراخې کړي؛ ترڅو په افغانستان کې د بشري ناورین پر وړاندې د افغاني سرې میاشتې قوت او اغېز نور هم ډېر او پیاوړی شي".
نوموړي د ناستې ګډونوالو ته وویل، چې "افغانستان جنګونو او نورو ګڼو ستونزو ځپلی هېواد دی، خو کورونا وبا په دې هېواد کې د ډېرو خلکو ژوند واخیست او د یادې ناروغۍ له امله د خلکو افتصادي وضعیت ډېر وځپل شو".
نوموړي د غونډې ګډونوالو ته وویل، چې "د کرونا له امله د محدودیتونو وضع کېدل، د سرحدونو بندېدل، د پروازونو مختل کېدل او د بې کارۍ د کچې لوړېدل هغه نور لاملونه دي، چې افغانستان یې له بشري ناورین سره مخ کړ؛ په دغسې بد حالت کې افغاني سره میاشت هوډ لري، چې په خپل ټول توان له بېوزلو کورنیو سره په خپل ټول قوت مرستو ته دوام ورکړي".
په ناسته کې د افغاني سرې میاشتې د سرپرست عمومي رییس له وینا وروسته ګډونوالو ټینګار درلود، چې دوی باید له افغانستان سره خپلې همکارۍ زیاتې کړي؛ ترڅو د افغانستان وګړي له روان بحران څخه نجات ومومي.
