د رونټيا پیاوړي کولو او د فساد پر ضد د تګلارې درې ورځنى روزنيز ورکشاپ پيل شو

یکشنبه، ۹ صَفَر ۱۴۴۷ 
د افغاني سرې مياشتې مرکزي دفتر کې د مالي، داخلي پلټنې، کارکوونکو چارو ریاستونو او کنټرول امریت یو شمېر کارکوونکو ته په افغانستان کې د ملي ټولنو نړیوال فدراسیون په مالي ملاتړ د روڼتیا پیاوړي کولو، فساد او درغلۍ پر وړاندې د مبارزې تګلارې د مسودې تر عنوان لاندې درې ورځنی روزنیز ورکشاپ پیل شو. 
د ورکشاپ په پرانیسته کې د داخلي پلټنې د ریاست رئیس ښاغلي مولوي محمد نسیم احمدي د اسلام له نظره د فساد د دنیوي او اُخروي زیانونو او مخنيوي لارو چارو په هکله وینا وکړه، نوموړي له کارکوونکو وغوښتل، څو د دندو په ترسره کولو کې، له فساد، درغلۍ او سستۍ څخه ځان وساتي، د بشپړ اخلاص او ریښتینولۍ له مخې سپارل شوي مسئولیتونه پر مخ یوسي. 
ورکشاپ کې به ګډونوالو ته د فساد او درغلۍ په مخنیوي کې د کارکوونکو د رول، ادارې او کارکوونکو ته د فساد زیانونو او همدا راز اړونده مسئولینو ته د فساد راپور ورکولو د میکانیزمونو په اړه روزنه ورکړل شي.