هرات؛ ۱۴ راستنېدونکو کډوالو کورنیو ته د کاروبار د پیاوړتیا لپاره اړین وسایل ووېشل شول
یکشنبه، ۱۱ صفر ۱۴۴۸
د افغاني سرې میاشتې له لوري، د هانګ کانګ سره صلیب په مالي او د ډنمارک سره صلیب په تخنیکي ملاتړ، د هرات ښار او ګذره ولسوالۍ ۱۴ راستنېدونکو کډوالو کورنیو ته د ۱۵۷ زره او ۴۸۰ افغانیو په ارزښت د خپلو کوچنیو کاروبارونو د پیاوړتیا لپاره اړین وسایل ووېشل شول.
دوی د هغو ۶۰ کورنیو له جملې وې، چې څه موده وړاندې یې د کوچنیو کاروبارونو د پیل لپاره د افغاني سرې میاشتې څخه مرسته ترلاسه کړې وه او دا مهال د کاروبارونو د پراختیا برخه کې د امکاناتو د کمښت له امله له ستونزو سره مخ وې. له دې کبله، د هغوی اړتیاوو ته په کتو نور اړین وسایل ورته برابر او ووېشل شول.
په دې مرسته کې د هرې کورنۍ د کسب او اړتیا له مخې کولر، لمریز برېښنايي سیستم، جنراتور، سیوری جوړوونکي او نور اړین وسایل شامل وو، څو د برېښنا نشتوالی، سخته ګرمي او په پرانیستو ځایونو کې د کار ستونزې راکمې او د کاروبار د دوام لپاره مناسب شرایط برابر شي.
دغه پروګرام د راستنېدونکو کډوالو د اقتصادي پیاوړتیا، پر ځان د بسیا کېدو او د دوامدارو عایداتي فرصتونو د رامنځته کولو په موخه پلي کېږي.
