کابل؛ په کندهار کې د افغاني سرې میاشتې ۸۷۲۱.۵۶ متر مربع ځمکه مزایدې ته وړاندې شوه
پنجشنبه، ۱ صفر ۱۴۴۸
د افغاني سرې میاشتې اړوند د کندهار ښار د څلورمې ناحیې، احمد شاهي سړک، دویم بلاک کې موقعیت لرونکې ۸۷۲۱.۵۶ متر مربع ځمکه د ۲۵ کلنې پانګونې په موخه مزایدې ته وړاندې شوه.
د مزایدې غونډه، چې د افغاني سرې میاشتې د مرکزي دفتر د تدارکاتو او تهیه آمریت له لوري تنظیم شوې وه، د څلورو ودانیزو شرکتونو استازو په کې ګډون کړی و.
ټاکل شوې ده، چې د داوطلبو شرکتونو د اسنادو له ارزونې او کره کتنې وروسته، د یادې ځمکې قرارداد د نافذه شرایطو له مخې هغه شرکت ته وسپارل شي، چې تر ټولو لوړ نرخ یې وړاندې کړی وي.
افغاني سره میاشت هڅه کوي، چې د خپلو شتمنیو د اغېزمن مدیریت او پانګونې له لارې مالي سرچینې پیاوړې او د بشري خدمتونو د دوام او پراختیا لپاره لا زیات امکانات برابر کړي.
