کابل؛ ۵۱ کارکوونکو ته د مسلکي زده کړو له بشپړېدو وروسته تصدیق پاڼې ووېشل شوې
دوشنبه، ۳ ذوالقعده ۱۴۴۷
د افغاني سرې میاشتې د کارکوونکو چارو ریاست په نوښت، د دې ادارې ۵۱ کارکوونکو ته د «سلوک تګلارې» تر عنوان لاندې د ښوونیزو او مسلکي زده کړو دویم پړاو د تصدیق پاڼو په وېشلو سره پای ته ورسېد.
په همدې مناسبت جوړو شوو مراسمو کې د افغاني سرې میاشتې مرستیال، ښاغلي حافظ عزیز الرحمن، د سکرتر جنرال د عملیاتي چارو مرستیال، ښاغلي مولوي روح الله عبدالسلام، د مرکزي دفتر یو شمېر رئیسانو، سلاکارانو او د مستقلو آمریتونو آمرینو ګډون درلود.
د غونډې پر مهال د افغاني سرې میاشتې مرستیال د یاد پروګرام پر بشپړېدو خوښي وښوده، د کارکوونکو چارو ریاست هڅې یې وستایلې او د ورته پروګرامونو دوام یې د ادارې د پرمختګ لپاره مهم وباله. نوموړي له کارکوونکو وغوښتل، چې خپلې زده کړې په ورځنیو چارو کې وکاروي او ډاډ یې ورکړ، چې د افغاني سرې مياشتې رهبري په دې برخه کې د اسانتیاوو برابرولو ته ژمنه ده.
ورپسې د سکرتر جنرال د عملیاتي چارو مرستیال ګډونوالو ته وینا وکړه او له ګډونوالو یې وغوښتل، چې خپلې زده کړې له نورو همکارانو سره شریکې کړي، څو په اداره کې د مثبت بدلون زمینه برابره شي.
همدارنګه، د کارکوونکو چارو رئیس ښاغلي مولوي شفيق الله اميني د کارکوونکو د ظرفیت لوړونه د خپل مسؤولیت یوه مهمه برخه وبلله او ټینګار یې وکړ، چې د اړتیاوو له مخې به ښوونیز پروګرامونه دوام ومومي، څو د کارکوونکو ستونزې راکمې شي.
په دې ورکشاپ کې ګډونوالو ته د اداري اصولو، دندو مکلفیتونو، تګلارو او له مراجعینو سره د ښه چلند په اړه لازمې زده کړې ورکړل شوې.
