د افغاني سرې مياشتې او اروپايي ټولنې کتنه؛ پر روغتيايي خدمتونو او بېړنيو مرستو ټينګار وشو
شنبه، ۱۵ جمادي الآخر ۱۴۴۷
د افغاني سرې میاشتې عمومي رئیس ښاغلي شیخ الحدیث شهاب الدین دلاور او مرستیال ښاغلي حافظ عزیز الرحمن، د اروپايي ټولنې د ملکي خوندیتوب او بشري مرستو لوی رئیس اندریاس پاپاکنستانتینو تر منځ د بشري مرستو د پراختیا او همکاریو د پیاوړتیا په موخه ناسته ترسره شوه.
ناسته کې عمومي رئیس د افغاني سرې میاشتې له لوري د روغتيايي خدمتونو، راستنېدونکو کډوالو او مرستونونو له لارې بې سرپرسته کورنیو او یتیمانو ته د وړاندې کېدونکو بشري خدمتونو په اړه معلومات وړاندې کړل او له یاد پلاوي يې غوښتنه وکړه؛ څو د ژمي په درشل کې د راستنېدونکو کډوالو او پېښځپلو پراخ لاسنیوی او ملاتړ وکړي او ډاډ یې ورکړ، چې افغاني سره میاشت دې برخه کې د هر ډول اسانتیاوو برابرولو ته چمتو ده.
ورپسې د اروپايي ټولنې د ملکي خونديتوب او بشري مرستو مشر د افغاني سرې میاشتې بشري فعالیتونه د خلکو اړتیاوو ته په کتو مهم یاد کړل او ډاډ یې څرګند کړ، چې د پېښو، اقلیمي بدلون او اړمنو ته د مرستو برابرولو برخه کې به خپلو همکاریو ته دوام ورکړي.
