په بادغيس ولایت کې د افغاني سرې میاشتې له لوري ۱۱۰۰ کورنیو ته د مرستو لړۍ لا هم روانه ده!
د افغاني سرې میاشتې ټولنې له لوري د بادغیس ولایت په سنگ آتش او آبکمري ولسوالیو ۱۱۰۰ اړمنو کورنیو ته د مرستو د وېش لړۍ لا هم نن روانه وه. په یادو ولسوالیو کې د افغاني سرې میاشتې له لوري د ۱۱۰۰ خوراکي موادو د وېش لړۍ تېره ورځ د لویدیځ زون د رييس ښاغلي انجينر محمد مصطفی نبي خېل، د بادغیس د سرې میاشتې د رییس وجيه الدين منتظري او یو شمېر کارکوونکو په شتون کې پیل شوه.
د یادو مرستو په ۸ قلمه خوراکي توکو کې ۵۰ کیلو اوړه، ۲۵ کیلو وریژې، ۱۰ لیتره غوړي، ۱ کیلو شین چای، ۵ کیلو بوره، ۷ کیلو لوبیا ، ۲ کیلو مالګه او یو ډبی بسکټ شامل دي، چې د نړېوال فدرېشن په مرسته چمتو شوي.
له یادو ۱۱۰۰ خوراکي بستو ۵۴۲ خوراکي بستې پرون اړمنو کورنیو ته په آبکمري ولسوالۍ کې توزیع شوې وې او د پاتې نورو د وېش لړۍ نن په سنگ آتش ولسوالۍ کې روانه وه.
