د افغاني سرې میاشتې ټولنې له ځانګړې اونۍ څخه لمانځنه وشوه!
د افغاني سرې میاشتې ټولنې له کلتوري ځانګړې اونۍ څخه د افغاني سرې میاشتې ټولنې د مشرتابه پلاوي، د ا.ا.ا د کابینې د غړو، دوست هیوادونو د سفیرانو، د سره صلیب د نړیوالې کمیټې او ملي ټولنو د نړیوال فدراسیون د استازو، د سرې میاشتې د کارکوونکو، رضاکارانو او غړو په ګډون سره د روان ۱۴۰۰ لمریز کال د تلې پر ۲۵ نیټه، په ټول هیواد کې د افغانستان د اسلامي امارت د حمایوي پیغام په لوستلو سره لمانځنه وشوه.
غونډه د قرانکریم په مبارکو آیتونو سره پیل، لومړی د افغانستان د اسلامي امارت حمایوي پیغام قرائت شو، ورپسې د افغاني سرې میاشتې ټولنې سرپرست رئیس ښاغلي مولوي مطیع الحق خالص مېلمنو ته د ښه راغلاست ترڅنګ د سرې میاشتې د ځانګړې اونۍ پر تاریخچه او اعانې پر راټولولو بشپړ مالومات وړاندې کړل او زیاته یې کړه: ځانګړې اونۍ د اړمنو سره د مرستې او د لاسنیوي غوره فرصت دی، له ټولو وګړو څخه هیله کوم؛ ترڅو پدې برخه کې له افغاني سرې میاشتې ټولنې سره مرسته وکړي. ده و ویل: ( خوښ یم چې یوځل بیا د افغاني سرې میاشتې ټولنې د ځانګړې اونۍ په درشل کې یو، دا اونۍ له ۱۳۳۱ لمریز کال راپدیخوا د ملي ټولنې د مالي بنسټ د پیاوړتیا په موخه د تلې له ۲۴ تر ۳۰ نېتې د هیواد په مرکز او ولایتونو کې په شانداره مراسمو سره لمانځل کیږي.)
د غونډې په ترڅ کې د سره صلیب د نړیوالې کمیټې د کوپریشن رئیسې آغلې رابرتا، په افغانستان کې د سره صلیب او سرې میاشتې د نړیوال فدراسیون رئیس ښاغلي نسیفوړ، د افغانستان د اسلامي امارت د قبایلو او سرحداتو سرپرست وزیر ښاغلي الحاج مولوي نورالله نوري، د کډوالو او مهاجرینو وزارت مرستیال ښاغلي ارسلان خان، د افغاني سرې میاشتې ټولنې د ځانګړې اونۍ په اړه مفصلې خبرې وکړې. غونډه د ښاغلي مولوي انورالحق مجاهد له لوري د دعایې په ویلو سره پای ته ورسیده.
