کابل؛ د ترکیې سرې میاشتې په مرسته مرکزي مرستون کې بیارغول شوې ودانۍ او د لمریزې برېښنا سیستم ګټې اخیستنې ته وسپارل شو
پنجشنبه، ۴ ربیع الاول ۱۴۴۷
د افغاني سرې میاشتې په مرکزي مرستون کې د ترکیې سرې میاشتې په مالي مرسته د مرستون د ودانۍ، نهه نورو بېلابېلو څانګو د بیا رغونې او لمریزې برېښنا سیستم د نصب چارې د افغاني سرې میاشتې د عمومي رئیس ښاغلي شیخ الحدیث شهاب الدین دلاور، په افغانستان کې د ترکیې د سفیر ښاغلي جنګ اونال او ترکیې سرې میاشتې د رئیس ښاغلي نعیم الله کریمي په شتون کې ګټې اخستنې ته وسپارل شوې.
په همدې موخه جوړو شویو مراسمو کې د افغاني سرې میاشتې عمومي رئیس د ترکیې او افغانستان اړیکې د اسلامي ورورولۍ له مخې تاریخي او اغېزمنې وبللې، مرکزي مرستون کې یې د ۶ کیلو واټه په ظرفیت د لمريزې برېښنا سیستم د نصب سربېره د ۶ واحدونو، د کالو وینځلو خونې، تشنابونو او پخلنځي د بیا رغونې په پار د ترکیې د سرې میاشتې له همکارۍ د مننې ترڅنګ زیاته کړه، ترکیه یو له هغو هېوادونو څخه ده، چې تل یې په سخت وخت کې افغاني سرې میاشتې ته د مرستې لاس ورکړی دی.
ورپسې په افغانستان کې د ترکیې سفیر او د ترکيې د سرې میاشتې رئیس د افغاني سرې میاشتې د بشرپالو خدمتونو ستاینه وکړه او د بشري مرستو د دوام ژمنه یې وکړه. ښاغلي جنګ اونال په خپلو خبرو کې یاده کړه چې نږدې راتلونکې کې به په ۷۰۰ټنه خوراکي او غیر خوراکي توکو بار ۲۱م رېل بشري مرسته افغانستان ته راورسېږي، څو پر وخت د اړمنو او پېښځپلو لاسنیوی وشي.
د یادونې وړ ده، چې تر دې وړاندې هم د ترکیې سرې میاشتې په بېلابېلو برخو کې له افغاني سرې میاشتې سره بشري مرستې ترسره کړي او د پېښځپلو ستونزو ته په رسېدو کې یې مهم رول لوبولی دی.
