کابل!
نن د ربيع الاول پر ۶مه افغاني سرې میاشتې يو ځل بيا د سوري زړه په رنځ اخته ۳۰ ماشومان پلازمېنه کابل کې ۲ روغتونونو ته د درملنې او عملیاتو په موخه ور وپېژندل. د یادو ناروغانو د پېژندنې پر مهال د افغاني سرې میاشتې سرپرست عمومي رئيس مولوي مطیع الحق خالص وویل "افغانستان د سوري زړه په رنځ اخته ډېر ماشومان لري، چې لامل يې تېرې جګړې او هېواد کې په لوړه کچه د کیمیاوي موادو کارېدنه کېدلی شي". نوموړي وویل"افغاني سرې مياشتې په تېرو څه باندې ۱۴ کلونو کې د سوري زړه په رنځ اخته ۲۶۴۸۱ ماشومان ثبت کړي، چې له ډلې یې د نېږدې نیمایي ناروغانو درملنه شوې. نوموړي وویل "افغاني سرې میاشتې یوازې په تېرو ۲ کلونو کې ۱۸۰۱ ماشومان د عملیاتو په موخه روغتونونو ته ورپېژندلي، چې د يادو ناروغانو له جملې د ۱۶۰۰ ناروغانو درملنه شوې او پاتې لا هم په روغتونونو کې تر درمنلې لاندې دي". ښاغلي مولوي مطیع الحق خالص وویل ."افغاني سره میاشت د دولت بودیجوي واحد نه دی، ټول خدمات يې د خپلو ملکيتونو د عوايدو، د کورنيو او بهرنيو خیرپاله ټولنو او په هېواد کې د شتمنو وګړو د مرستو له لارې ترسره کېږي". نوموړي وويل "زمونږ د کار ساحه پراخه ده او په راتلونکي کې مو هوډ دی، چې په ټول هېواد کې د امبولانس خدمات ترسره کړو، ترڅو په هېواد کې د اړمنو او بېوزلو کورنيو ناروغان او وفات شوي غړي په وړيا توګه تر روغتونونو او خپلو کورونو ورسوو".
