د افغاني سرې میاشتې سرپرست رییس په ترکیه کې د هلال سبز خیریه ټولنې له رییس سره وکتل!
چهارشنبه د روان ۱۴۴۳ سپوږمیزکال د رمضان المبارک میاشتې پر۱۹ مه نېټه د افغاني سرې میاشتې سرپرست رییس ښاغلي مولوي مطیع الحق خالص او ورسره مل پلاوي د ترکیې هېواد د هلال سبز خیریه ټولنې له رییس او استازو سره لیدنه ترسره کړه.
په دې لیدنه کې د هلال سبز خیریه ټولنې رییس د افغاني سرې میاشتې سرپرست رییس ښاغلي مولوي مطیع الحق خالص او مل پلاوي ته د ښه راغلاست ترڅنګ په مخدره توکو د روږدو کسانو د ژغورنې پر پوهاوي، درملنې او په دې برخه کې د شته ستونزو پر هواري خبرې وکړې او د هر ډول مرستې ژمنه یې وکړه.
په مقابل کې د ا فغاني سرې میاشتې سرپرست رییس د هلال سبزخیریه ټولنې له پخوانیو مرستو مننه وکړه او په راتلونکي کې یې هم د افغاني سرې میاشتې ټولنې له لوري د ګډې همکارۍ او مرستې ډاډ ورکړ.
