کابل؛ په بېړنیو حالاتو کې د اوبو او روغتیا ساتنې اړوند فعاليتونو په اړه شپږ ورځنی روزنیز ورکشاپ پیل شو
شنبه، ۲۷ ربیع الآخر ۱۴۴۸
د افغاني سرې میاشتې د روغتیايي خدمتونو ریاست له لوري د سره صلیب نړیوالې کمېټې په مالي ملاتړ په بېړنیو حالاتو کې د اوبو او روغتیا ساتنې اړوند فعاليتونو په اړه شپږ ورځنی روزنیز ورکشاپ په کابل کې پیل شو.
په دغه ورکشاپ کې د افغاني سرې میاشتې د روغتیايي خدمتونو ریاست د اوبو او روغتیا ساتنې آمریت اړوند کارکوونکو ترڅنګ د سره صلیب نړیوالې کمېټې او د کلیو د بیارغونې او پراختیا وزارت کارکوونکي هم ګډون لري.
د ورکشاپ د پرانیستې په مراسمو کې د افغاني سرې میاشتې د سکرتر جنرال عملیاتي مرستیال ښاغلي مولوي روح الله عبدالسلام د اوبو د اهمیت او د ژوندیو موجوداتو د ژوند او پایښت لپاره د هغې د حیاتي ارزښت په اړه خبرې وکړې.
نوموړي وویل چې د ټولو ژوندیو موجوداتو ژوند په اوبو پورې تړلی دی او د اوبو سمه کارونه او مدیریت د هر انسان مسؤولیت دی. هغه زیاته کړه چې د کډوالۍ، وچکالۍ او بېړنیو حالاتو پر مهال ګڼ شمېر خلک پاکو اوبو ته له لاسرسي څخه بې برخې کېږي؛ له همدې امله د اوبو مدیریت او د پاکو اوبو برابرول ځانګړی اهمیت لري.
ورپسې د افغاني سرې میاشتې د روغتیايي خدمتونو رئیس ډاکټر عبدالله عرفان د روزنیز ورکشاپ د پیل هرکلی وکړ او هیله یې څرګنده کړه چې دغه پروګرام به د بېړنیو حالاتو پر مهال د اوبو او روغتیا ساتنې په برخه کې د کارکوونکو د مسلکي وړتیاوو په لوړولو کې مرسته وکړي.
نوموړي پاکې اوبه د ګڼو ناروغیو په مخنیوي کې مهمې وبللې او د ټولنې وګړو ته یې د پاکو اوبو برابرول د اړوندو ادارو ګډ مسؤولیت وباله.
په دغه شپږ ورځني ورکشاپ کې به ګډونوالو ته د اوبو د کیفیت، تصفیې، پاکو اوبو ته د لاسرسي او په بېړنیو حالاتو کې د اوبو د برابرولو د لارو چارو په اړه اړین معلومات او عملي لارښوونې وړاندې شي.
