کابل؛ د افغاني سرې میاشتې او کاري شریکانو ترمنځ د نوې کاري شېوې په اړه ناسته وشوه
سهشنبه، ۲ ربیعالآخر ۱۴۴۸
د افغاني سرې میاشتې د سکرتر جنرال عملیاتي مرستیال ښاغلي مولوي روح الله عبدالسلام او د پلان او پالیسۍ مرستیال ښاغلي مولوي عزت الله امین په شتون کې د دې ادارې او په افغانستان کې د کاري شریکانو د استازو ترمنځ د نوې کاري شېوې په اړه ناسته وشوه.
په دې ناسته کې په افغانستان کې د ملي ټولنو نړیوال فدراسیون مشر ښاغلي حسام فیصل او د ډنمارک او ناروې سرو صلیبونو مسؤلینو حضوري ګډون کړی و، په داسې حال کې چې د ترکیې سرې میاشتې او د بریتانیا او فنلنډ سرو صلیبونو مسؤلینو په انلاین بڼه ګډون کړی و.
په ناسته کې د ګډو فعالیتونو د لا ښه تنظیم، همغږۍ او د کاري پروسې د اغېزمنتیا په موخه پنځه تخنیکي کاري ګروپونه وټاکل شول، چې بشري دېپلوماسي، د ملي ټولنې پراختیا، پېښې، روغتیا او مرستونونه یې برخې دي.
همداراز د یادو کاري ګروپونو لپاره د دندو د لایحو پر جوړولو او په تخنیکي ګروپونو کې د کاري شریکانو د شاملولو په اړه بحث او نظرونه شریک شول.
د ناستې په پیل کې د افغاني سرې میاشتې د سکرتر جنرال عملیاتي مرستیال د نوې کاري شېوې پر اهمیت خبرې وکړې او ویې ویل چې د دې شېوې په پلي کېدو سره به د افغاني سرې میاشتې او کاري شریکانو ترمنځ د همغږۍ او ګډ کار بهیر لا منظم او اغېزمن شي او د فعالیتونو په ترسره کولو کې به د وخت او امکاناتو مدیریت ښه شي.
نوموړي زیاته کړه چې د تخنیکي کاري ګروپونو جوړول به د بېلابېلو برخو د فعالیتونو په همغږۍ، د مسوولیتونو په روښانه کولو او د ګډو پروګرامونو په اغېزمن پلي کېدو کې مرسته وکړي.
په افغانستان کې د ملي ټولنو نړیوال فدراسیون مشر د نوې کاري شېوې هرکلی وکړ او ویې ویل چې د کاري شریکانو ترمنځ منظمې همغږۍ او ګډ کار ته اړتیا ده، څو بشري فعالیتونه په لا اغېزمنه او منسجمه توګه ترسره شي.
نوموړي وویل چې تخنیکي کاري ګروپونه به د بېلابېلو برخو د فعالیتونو په همغږۍ او د کاري شریکانو ترمنځ د تجربو، معلوماتو او نظریاتو په شریکولو کې مرسته وکړي.
ښاغلي فیصل د نوې کاري شېوې د بریالي پلي کېدو لپاره د ټولو کاري شریکانو پر ګډې همکارۍ، دوامدارې همغږۍ او روښانه کاري میکانیزمونو هم ټینګار وکړ.
د ناستې په پای کې ګډونوالو د نوې کاري شېوې د عملي کېدو او د تخنیکي کاري ګروپونو د فعالیتونو د پیل لپاره پر راتلونکو ګامونو خبرې وکړې.
افغاني سره میاشت د خپلو کاري شریکانو ترمنځ د منظمې همغږۍ او ګډ کار د پیاوړتیا له لارې هڅه کوي، څو بشري فعالیتونه په اغېزمن، منسجم او د اړتیاوو له مخې ترسره شي.
