کابل؛ د شمال زون زلزله ځپلو ته د ځواب وينې برخه کې د تجربو شریکولو ورکشاپ داير شو
یکشنبه، ۱۶ ربیعالأول ۱۴۴۸
د افغاني سرې میاشتې د پلان جوړونې آمریت په نوښت او په افغانستان کې د ملي ټولنو نړیوال فدراسیون په مالي ملاتړ، د شمال زون د زلزله ځپلو لپاره د ځواب وينې او رسيده ګۍ پر مهال د ترلاسه شویو تجربو او زده شویو درسونو د شریکولو په موخه یو ورځنی ورکشاپ داير شو.
دغه ورکشاپ د افغاني سرې میاشتې په مرکزي دفتر کې جوړ شوی، چې د پلان جوړونې آمریت، د پېښو، روغتیايي خدمتونو او ځوانانو او رضاکارانو ریاستونو یو شمېر کارکوونکو او همدارنګه د شمال زون اړوند د بلخ او سمنګان ولایتونو د نماینده ګیو د روغتیا او پېښو برخو کارکوونکو په کې ګډون کړی دی.
د ورکشاپ په پرانیسته کې د افغاني سرې میاشتې د سکرتر جنرال د عملیاتي چارو مرستیال، ښاغلي مولوي روح الله عبدالسلام او د پلان جوړونې آمر ډاکټر محمد کریم د ورکشاپ د موخو او اهمیت په اړه خبرې وکړې.
هغوی له ګډونوالو وغوښتل چې خپلې عملي تجربې، ستونزې، لاسته راوړنې او وړاندیزونه شریک کړي، څو د ګډو تجربو له تبادلې څخه د راتلونکي لپاره د بېړنیو حالاتو پر وړاندې د چمتووالي او اغېزمنې ځواب وینې د ظرفیتونو په پیاوړتیا کې ګټه واخیستل شي.
دوی د پېښځپلو د ژوند ژغورنې، د بېړنیو حالاتو پر مهال د اغېزمن غبرګون او د پېښو له امله د رامنځته کېدونکو زیانونو د مخنیوي او راکمولو په برخه کې د دا ډول روزنیزو پروګرامونو پر ارزښت ټینګار وکړ.
ټاکل شوې ده، چې د ورکشاپ په ترڅ کې به ګډونوال د شمال زون زلزله ځپلو ته د ځواب وينې پر مهال ترلاسه شوې تجربې او زده شوي درسونه و ارزوي او د راتلونکو پېښو پر مهال به د لا اغېزمن ځواب ویلو لپاره خپل نظرونه او وړاندیزونه شریک کړي.
