پکتیکا؛ پر ۱۵۰۰ بېځایه شویو کورنیو ۲۲.۵ میلیونه افغانۍ نغدي مرسته ووېشل شوه
چهارشنبه، ۱۲ ربیع الأول ۱۴۴۸
د افغاني سرې میاشتې له لوري د پکتیکا ولایت په برمل، شکین او تروو ولسوالیو کې پر ۱۵۰۰ داخلي بېځایه شویو کورنیو ۲۲.۵ میلیونه افغانۍ نغدي مرسته ووېشل شوه.
یاده مرسته د سره صلیب نړیوالې کمېټې له لوري چمتو شوې وه، چې هرې کورنۍ ۱۵ زره افغانۍ ترلاسه کړې.
د مرستې اخیستونکو کورنیو له ډلې ۱۱۹۲ کورنۍ د برمل، ۲۰۰ کورنۍ د شکین او ۱۰۸ کورنۍ د تروو ولسوالۍ اوسېدونکې وې.
دغه نغدي مرسته بېځایه شویو کورنیو ته د لومړنیو اړتیاوو د پوره کولو او د بېځایه کېدو له امله د رامنځته شویو ستونزو د راکمولو په موخه ورکړل شوه.
افغاني سره میاشت د پېښو او ناورینونو له امله د بېځایه شویو کورنیو لاسنیوی خپل بشري مسؤولیت ګڼي او هڅه کوي، چې د بېړنیو مرستو له لارې د هغوی لومړنۍ اړتیاوې پوره کړي.
