کابل؛ د افغاني سرې میاشتې عمومي رئیس او د سره صلیب نړیوالې کمېټې مشر له قلبي روغتون څخه لیدنه وکړه
دوشنبه، ۳ ربیع الأول ۱۴۴۸
د افغاني سرې میاشتې عمومي رئیس شیخ الحدیث شهاب الدین دلاور او په افغانستان کې د سره صلیب نړیوالې کمېټې مشر ښاغلي جوهانس بروور له قلبي روغتون څخه لیدنه وکړه او د زړه سوري لرونکو ماشومانو د درملنې بهیر او ناروغانو ته د وړاندې کېدونکو روغتیايي خدمتونو په اړه یې معلومات ترلاسه کړل.
د روغتون د بېلابېلو برخو د لیدنې پر مهال دواړو مشرانو د متخصصو ډاکټرانو او روغتیايي کارکوونکو فعالیتونه، ناروغانو ته د وړاندې کېدونکو خدمتونو د څرنګوالي او د زړه سوري لرونکو ماشومانو د درملنې د بهیر په اړه له اړونده مسٶولينو معلومات واورېدل.
ښاغلي دلاور د روغتون د فعالیتونو او د زړه سوري لرونکو ماشومانو د درملنې په برخه کې د متخصصو ډاکټرانو او روغتیايي کارکوونکو هڅې مثبتې وبللې او ټینګار یې وکړ، چې ناروغانو ته دې معیاري روغتیايي خدمتونه وړاندې او د خدمتونو د کیفیت د لا ښه والي لپاره دې دوامدارې هڅې وشي.
ښاغلي بروور د روغتون د فعالیتونو او ناروغانو ته د وړاندې کېدونکو روغتیايي خدمتونو له کیفیت څخه خوښي څرګنده کړه او د زړه سوري لرونکو ماشومانو لپاره یې په افغانستان کې د دغه ډول معیاري روغتیايي مرکز جوړېدل یو مهم ګام وباله. نوموړي ډاډ ورکړ، چې د سره صلیب نړیواله کمېټه به په دې برخه کې د افغاني سرې میاشتې ملاتړ ته دوام ورکړي.
