کابل؛ د ایکو پروژې د نوي پړاو د پیل او تېرو فعالیتونو د ارزونې په اړه ناسته وشوه
دوشنبه، ۱۲ صفر ۱۴۴۸
د افغاني سرې میاشتې په نوښت د هرات، پکتیا، کابل او ننګرهار سیمه ییزو زونونو، د پکتیکا او نیمروز نماینده ګیو د مسؤولینو، روغتیايي کارکوونکو او د پېښو د مدیرانو په ګډون د ایکو پروژې د تېرو اتو میاشتو د فعالیتونو د ارزونې او د نوي پړاو د پیل په موخه ګډه ناسته ترسره شوه.
په ناسته کې راستنېدونکو کډوالو ته د وړاندې شویو خدمتونو، لاسته راوړنو، ننګونو او راتلونکو پلانونو ارزونه وشوه او ګډونوالو د خدمتونو د لا ښه تنظیم، اغېزمنتیا او کیفیت لوړولو لپاره خپل نظرونه او وړاندیزونه شریک کړل.
د افغاني سرې میاشتې د سکرتر جنرال عملیاتي مرستیال، مولوي روح الله عبدالسلام، د فعالیتونو دوامداره ارزونه د خدمتونو د کیفیت د ښه والي مهم اصل وباله او د راستنېدونکو کډوالو د ملاتړ په برخه کې یې د کاري شریکانو له دوامدارې همکارۍ مننه وکړه.
د روغتیايي خدمتونو رئیس، ډاکټر عبدالله عرفان، وویل چې د ایکو پروژې له لارې راستنېدونکو کډوالو ته روغتیايي خدمتونه، غیر خوراکي توکي او نغدي مرستې وړاندې کېږي او د ارزونې پایلې به د راتلونکي پړاو د خدمتونو د لا اغېزمن تطبیق لپاره وکارول شي.
د نړیوالو اړیکو رئیس ډاکټر ذرخان احمدزي، وویل چې د ایکو پروژې د شلو میاشتو لپاره غځېدل د افغاني سرې میاشتې د اغېزمنو فعالیتونو، د خدمتونو د کیفیت او د کاري ټیم د ژمنتیا څرګندونه کوي.
د ملي ټولنو نړیوال فدراسیون استازې، آغلې ماري مانریکا، د افغاني سرې میاشتې د بشري خدمتونو ستاینه وکړه او ډاډ یې ورکړ، چې نړیوال فدراسیون به د راستنېدونکو کډوالو او نورو زیانمنو خلکو د ملاتړ لپاره خپلو همکاریو ته دوام ورکړي.
د یادونې وړ ده، چې د ایکو پروژه د اروپايي اتحادیې په مالي ملاتړ، د ملي ټولنو نړیوال فدراسیون، د ډنمارک او ناروې د سره صلیبونو په همغږۍ، د افغاني سرې میاشتې له لارې پلي کېږي.
افغاني سره میاشت د خپلو کورنیو او نړیوالو کاري شریکانو په همغږۍ هڅه کوي؛ څو د راستنېدونکو کډوالو او نورو اړمنو خلکو لپاره د روغتیايي خدمتونو، بشري مرستو او د ژوند د ښه والي پروګرامونه لا اغېزمن او دوامدار کړي.
