کابل؛ کارکوونکو ته د مالي محاسبې شپږ ورځنی روزنیز ورکشاپ پیل شو
سې شنبه، ۲۱ المحرم ۱۴۴۸
د افغاني سرې میاشتې له لوري، د ناروې سره صلیب په مالي ملاتړ، په مرکزي دفتر کې د مالي ریاست، د زړه روغتون، مرکزي روغتون او کنټرول آمریت ۲۰ تنو کارکوونکو ته د مالي محاسبې شپږ ورځنی روزنیز ورکشاپ پیل شو.
د ورکشاپ د پرانیستې په مراسمو کې د مالي چارو رئیس ښاغلي حافظ شبیر احمد عثماني د اسلام له نظره د مالي چارو د سالم مدیریت پر اهمیت خبرې وکړې. نوموړي وویل، ژمنتیا، امانتداري او مسلکیتوب د هرې ادارې د بریالي او اغېزمن فعالیت بنسټونه دي. هغه د حضرت یوسف علیه السلام د ژوند بېلګه وړاندې کړه او زیاته یې کړه، چې نوموړی د خپلې وړتیا، امانتدارۍ او صداقت له امله د مالي چارو د مدیریت مسؤولیت ته وټاکل شو.
نوموړي د علمي او مسلکي وړتیاوو پر لوړولو ټینګار وکړ او ویې ویل، چې زدهکړه د فردي او اداري پرمختګ بنسټ دی او د مالي چارو د روڼتیا، اغېزمنتیا او مسؤولانه مدیریت په پیاوړتیا کې مهم رول لري. هغه له ګډونوالو وغوښتل، چې له دې روزنیز فرصت څخه اعظمي ګټه واخلي او خپلې علمي او مسلکي وړتیاوې لا پیاوړې کړي.
په دې شپږ ورځني ورکشاپ کې به ګډونوالو ته د مالي محاسبې، مالي مدیریت، مالي راپور ورکونې، بودیجې جوړونې، روڼتیا او له کاري شریکانو سره د مالي همغږۍ په اړه نظري او عملي روزنې وړاندې شي.
تمه ده، چې د دې ورکشاپ له بشپړېدو وروسته به د ګډونوالو مسلکي وړتیاوې لا پیاوړې او د مالي چارو د مدیریت، حساب ورکونې او روڼتیا کچه به نوره هم لوړه شي.
