پکتیکا کې ۱۰۰ داخلي بېځایه شویو کورنیو ته غیر خوراکي توکي ووېشل شول
سې شنبه، ۲۳ ذو الحجه ۱۴۴۷
د افغاني سرې میاشتې له لوري د پکتیکا ولایت د تروو ولسوالۍ ۱۰۰ داخلي بېځایه شویو کورنیو ته غیر خوراکي توکي ووېشل شول.
یاده مرسته د ملي ټولنو نړیوال فدراسیون له لوري چمتو شوې وه، چې له مخې یې هرې کورنۍ ته ۱ خېمه، ۷ کمپلې، ۲ ترپالونه، د پخلنځي د توکو یو سیټ او ۲ د اوبو بوشکې ورکړل شوې.
دغه مرسته د داخلي بېځایه شویو کورنیو د عاجلو اړتیاوو د پوره کولو او د هغوی د ژوند د لومړنیو ستونزو د راکمولو په موخه ترسره شوه.
افغاني سره میاشت هڅه کوي د طبیعي پېښو او ناورینونو له امله زیانمنو او بېځایه شویو کورنیو ته پر وخت بشري مرستې ورسوي او د هغوی لومړنیو اړتیاوو ته ځواب ووایي.
