تخار؛ ۵۰ مېرمنو ته د خیاطۍ حرفوي زده کړو او معیشتي ملاتړ زمینه برابره شوه
دوشنبه، ۱ ذو الحجه ۱۴۴۷
د افغاني سرې میاشتې له لوري د تخار ولایت په بهارک او اشکمش ولسوالیو کې ۵۰ مېرمنو ته د خیاطۍ حرفوي زده کړو او معیشتي ملاتړ زمینه برابره شوه، چې د طبیعي پېښو او اقلیمي بدلونونو له امله زیانمنې شوې وې.
ټاکل شوې ده، چې ګډونوالې به شپږو میاشتو لپاره د خیاطۍ په څلورو روزنیزو مرکزونو کې د مسلکي استادانو تر لارښوونې لاندې د خياطۍ حرفوي زده کړې ترلاسه کړي او د روزنې تر بشپړېدو وروسته به ورته تصدیق پاڼې هم ورکړل شي.
د حرفوي زده کړو له پیل وړاندې يادو مېرمنو او یا د هغوی سرپرستانو ته د خیاطۍ د وسایلو او اړینو توکو د پېرلو لپاره ۴۵۰ زره افغانۍ نغدي مرسته ورکړل شوه، چې له مخې یې د هرې مېرمنې لپاره ۹ زره افغانۍ ځانګړې شوې وې.
دغه پروګرام د اقلیمي بدلونونو پروژې په چوکاټ کې د افغاني سرې میاشتې د پېښو ریاست، د خطر کمونې آمریت له لوري د ملي ټولنو نړیوال فدراسیون په مالي ملاتړ پلې کېږي، چې موخه یې د مېرمنو د حرفوي مهارتونو لوړول، اقتصادي پیاوړتیا، د کار موندنې فرصتونو رامنځته کول او د اقلیمي بدلونونو له امله د رامنځته شویو اقتصادي ستونزو کمول دي.
افغاني سره میاشت هڅه کوي د حرفوي او معیشتي پروګرامونو له لارې د ټولنې اړمنو قشرونو ته د کار، عاید او ځان بسیاینې فرصتونه برابر کړي.
