د رسنیو د بحران مدیریت په اړه نشراتي مديرانو ته درې ورځنی روزنیز ورکشاپ پیل شو
دوشنبه، ۲۶ شوال ۱۴۴۷
د افغاني سرې میاشتې د اطلاعاتو او خپرونو ریاست له لوري د مرکز او ولایتونو د نشراتي مدیرانو لپاره درې ورځنی ښوونیز او عملي ورکشاپ پیل شو.
یاد ورکشاپ چې د بحراني حالاتو پر مهال د رسنیو د بحران مدیریت، منځپانګې جوړولو او راپور ورکولو تر سرلیک لاندې جوړ شوی، په افغانستان کې د آی سي آر سي په مالي ملاتړ ترسره کېږي.
د ورکشاپ د پرانیستې په مراسمو کې د افغاني سرې میاشتې د اطلاعاتو او خپرونو رئیس، ښاغلي جمعه خان نائل، د ورکشاپ د اهمیت او اړتیا په اړه وینا وکړه، هغه د افغاني سرې میاشتې فعالیتونو ته پر وخت رسنیز پوښښ ورکول او د خلکو غږ تر نورو رسول د ټولو نشراتي مدیرانو ګډ مسؤولیت وباله. نوموړي ګډونوالو ته سپارښتنه وکړه، چې له دې فرصت څخه پوره ګټه واخلي او خپلې مسلکي وړتیاوې لا پیاوړې کړي.
په دې ورکشاپ کې به د نشراتي مدیرانو لپاره د بحران پر مهال د خبري منځپانګې او مطبوعاتي اعلامیو د جوړښت، د انځور او ویډیو اخیستلو او راپور لیکلو په برخو کې نظري او عملي زده کړې ورکړل شي.
